ရင်သွေးငယ်ရဲ့ဆံကေသာ

မိဘတိုင်းအတွက်တော့ ရင်သွေးဟူက ချစ်မဝ ဖြစ်ကြရသည်မှာ ကမ္ဘာဦးထုံးစံပင် ဖြစ်ချေ၏။ မွေးဖွားလာသော သမီးတိုင်းကို အဖိုးထိုက် အဖိုး တန် ရတနာအဖြစ် တန်ဖိုးထားကြသည်။ မြတ်နိုး ယုယကြသည်။ အရိပ်တကြည့်ကြည့်နှင့် ဂရုစိုက်ကြသည်။

ဤ၌ အချို့အချို့သော မိဘများက ၎င်းတို့၏ ရင်သွေးငယ် အနာဂတ်အတွက် ကြိုတင်သိလိုကြသည်။ ထိုအခါဝယ် အင်္ဂဝိဇ္ဇာပညာရပ်များက ရင်သွေးငယ်တို့၏ အင်္ဂါရပ်အသီးသီးကို ခြုံငုံသုံးသပ်လျက် နိမိတ်ဖတ်ကြားနိုင်စွမ်းရှိလေသည်။ အထူးသဖြင့် ရင်သွေးငယ်တို့၏ ပြုပြင်ထားခြင်းမရှိသော သဘာဝ ဆံကေသာကို ကြည့်ရှုလျက် အနာဂတ် ကို နိမိတ်ဖတ်နိုင်ကြောင်း လေ့လာတွေ့ရှိရသဖြင့်   ရင်သွေးချစ် မိဘများ ဗဟုသုတအဖြစ် သိရှိနိုင်ကြ စေရန် တင်ပြလိုက်ရပါသည်။

၁။ ရင်သွေးငယ်၏ ဆံပင်မှာ ရွှေဝါရောင် ဖြစ်လျှင် စိတ်ကူးစိတ်သန်း ကောင်းမွန်တတ်ပြီး ကျော်ကြားသော ပန်းချီ၊ ဂီတ၊ အနုပညာရှင်ဖြစ် တတ်ပါသည်။

၂။ ရင်သွေးငယ်၏ဆံပင်မှာ လွန်စွာ သန်စွမ်းလျှင် သနားကြင်နာတတ်သူ ကတိစကားအလေး ထားသူ ဖြောင့်မတ်သူ ဖြစ်တတ်၏။

၃။ ရင်သွေးငယ်၏ ဆံပင်မှာ နူးညံ့ပျော့ ပျောင်းလျှင် ဂရုစိုက်ပေးဖို့ လိုပါသည်။ ငယ်စဉ်ကာလ၌ ချူချာတတ်၍ဖြစ်ပါသည်။

၄။ ရင်သွေး၏ ဆံပင်မှာ လှိုင်းတွန့်များ ဖြစ်ပေါ်နေလျှင် လုံ့လရှိသူ၊ စိတ်ပျက်လွယ်သူ၊ အားငယ် စိတ်ဝင်လွယ်သူဖြစ်တတ်သည်။

၅။ ရင်သွေးငယ်၏ ဆံပင်မှာ နီကြောင်ကြောင်ဖြစ်နေပါလျှင် ချစ်လွယ်ခင်လွယ်တတ်၏။ စိတ်မြန်၊ လက်မြန်ရှိတတ်၏။ သွက်သွက်လက်လက်နှင့် အရာရာကို စူးစမ်းတတ်၏။

၆။ ရင်သွေးငယ်၏ ဆံပင်မှာကြမ်းတမ်းလျှင် ကျန်းမာရေး လွန်စွာ ကောင်းတတ်ပါသည်။

၇။ ကလေးငယ်၏ ဆံပင်မှာ ဖြောင့်စင်းနေလျှင် စိတ်နှလုံးသဘောထားကောင်းတတ်၏။ လူကြီး အပေါ် ဆန့်ကျင်စိတ်ရှိတတ်၏။

၈။ ကလေးငယ်၏ ဆံပင်မည်းနက်လျှင် အနုပညာကို ဝါသနာထုံတတ်၏။ ၎င်းကို ဆုံးမပါက ကြမ်းတမ်းစွာ မဆုံးမပါနှင့် ပျော့ပျောင်းညင်သာစွာ    ဆုံးမခြင်းဖြင့် လိမ္မာရေးခြားရှိလာပါလိမ့်မည်။

ချစ်မမသက်