အကာအကွယ်အရံအတားများ

ဖုန်းရွှေပြဿနာတွေကို ခြေဖျက်နိုင်အောင် ကာကွယ်ရံတားလို့ ရပါတယ်။

အဲဒီအထဲက အချို့ကိုတင်ပြရရင် …

(၁) မကောင်းတဲ့စွမ်းအားတွေ ဖျက်ဖို့ မီးရောင်ထိန်ထိန်ထွန်းပေးပါ။

(၂) ယန်ဓာတ်ဖြစ်တဲ့ အလင်းရောင်၊ အသံ၊ အရောင်တောက်တောက်တွေ သုံးစွဲပြီး ယင်ဓာတ်ကို ခြေဖျက်ပါ။

(၃) မကောင်းတဲ့ဓာတ်တွေဖယ်ရှားဖို့ လေသာ ဆည်းလည်း တပ်ပေးပါ။

(၄) အဆိပ်မြားတွေ ကာကွယ်ဖို့ ပါ့ကွ မှန်တပ်ပါ။

(၅) မကောင်းတဲ့ဓာတ်တွေကို ဖယ်ရှားဖို့ သံသာခေါင်းလောင်းတွေ ချိတ်ဆွဲပါ။

(၆) ယန်းစွမ်း အင်ကို အားပျော့စေဖို့ သလင်းကျောက်ကိုသုံးပါ။

(၇) မကောင်းတဲ့ ဓာတ်တွေဆီးတားဖို့ ခန်းဆီးလိုက်ကာ တပ်ဆင်ပါ။

(၈)ပိုမိုမင်္ဂလာရှိတဲ့အရပ်ဒေသ သိဖို့ သံလိုက်အိမ်မြှောင်သုံးပါ။

(၉) ဟန်ချက်မညီ ဖြစ်နေတဲ့ဓာတ်တွေ ခြေဖျက်ဖို့ အရောင်တွေသုံးပါ။

(၁၀) ဓာတ်ကြီးငါးပါး မှန်အောင်လုပ်ဖို့ အခြေခံကုထုံးတွေ သုံးစွဲပါ။

ငါးမွေးကန်

ရေဓာတ်ဟာ ဖုန်းရွှေပညာမှာ အရေးကြီးတယ်။ ရုံးခန်းရဲ့ အရှေ့တောင်ထောင့်ဟာ ဓနဥစ္စာထောင့်ဖြစ်လို့ ရေဓာတ်ပိုထားရမယ်။ ရှင်သန်ကူးခတ်နေတဲ့ ငါးလေးတွေ မွေးထားတဲ့ ငါးကန်ရှိရင် ပို ကောင်းတယ်။

ငါးကန်ကို အိမ်ရှေ့တံခါးမကြီးရဲ့ လက်ယာဘက်မှာတော့ ဘယ်တော့မှမထားပါနဲ့။ (အိမ်ထဲက ကြည့်လို့ လက်ယာဘက်ကျတဲ့နေရာကို ဆိုလိုပါတယ်) အဲဒီလိုထားမိရင် အိမ်က ခင်ပွန်းသည်က စိတ်ကစားတတ်ပြီး အိမ်ပြင်မှာ ပျော်တတ်တဲ့သူ ဖြစ်သွားမယ်။

အဲရိုးဝါးနားငါး

 

ဒီငါးမျိုးကို မလေးရှား၊ စင်ကာပူနဲ့ ထိုင်းနိုင်ငံ တို့က တရုတ်လူမျိုးစီးပွားရေးလုပ်ငန်းရှင်တွေ မမွေး မဖြစ် မွေးကြတယ်။ ဒီငါးမွေးတာ လာဘ်ကောင်း တယ်လို့ ယုံကြည်ထားကြလို့ပဲ။

အဲရိုးဝါးနားငါးကို နဂါးငါးလို့လည်း ခေါ်ကြတယ်။

ငါးမွေးရင် တစ်ကောင် ဒါမှမဟုတ်သုံးကောင် ငါးကောင်စသဖြင့် မဂဏန်းပဲ မွေးရမယ်။ နှစ်ကောင် စုံတွဲ မမွေးရဘူး။

ဒီငါးမျိုးကို အစာကောင်းကောင်းကျွေးပြီး မွေးရင် နဂိုမူလ အရောင်ငွေရောင်ကနေ ရွှေရောင် ဒါမှမဟုတ် ပန်းရောင်ပြောင်းလာတတ်တယ်။

ဒါဆိုရင် စီးပွားတိုးမယ့် နိမိတ်ပြတယ်လို့ သိထားရမယ်။

ငါးကန်ထဲမှာ ရေညှိရေမှော်တွေ အခြားအလှအပ တန်ဆာဆင်ပစ္စည်းတွေနဲ့ ရှုပ်ပွမနေစေနဲ့။ ငါးကန်က ရှင်းလင်းနေလေ ပိုကောင်းလေပဲ။

ငါးကန်ကို အိမ်ရဲ့ မြောက်ဘက်ခြမ်းမှာ ထားသင့်ပါတယ်။ အရှေ့နဲ့ အရှေ့တောင်ဘက်တွေ မှာလည်း ထားနိုင်ပါတယ်။

သတိပြုဖို့ကတော့ ငါးကန်ကို အိပ်ခန်းထဲမှာ ဘယ်တော့မှ မထားပါနဲ့။

 

ဟိန်းလတ်