ဂုဏ်တော် ၉ ပါး ထုံစို့လား

 

မှတ်မှတ်ရရ ထိုနေ့သည် ကဆုန်လပြည့်နေ့ ဖြစ်ပါသည်။ ကျွန်တော်သည် အနည်းငယ် နေမကောင်းဖြစ်နေသည့်ကြားမှပင် ပုဂံမြို့ဟောင်းတစ် နေရာရှိ ရှင်အဇ္ဇဂေါဏဘုရားသို့သွား၍ အဓိဋ္ဌာန်ပုတီး စိပ်ခဲ့ပါသည်။

အဓိဋ္ဌာန်ပုတီးပတ်ရေ ပြည့်ပြီးနောက် ခေတ္တနားနေစဉ် သောက်ထားသောဆေးအရှိန်များကြောင့် ငိုက်မြည်းသွားခဲ့ပါသည်။

ထိုသို့ မှေးခနဲအငိုက်တွင် ဆရာတော်တစ်ပါး ကြွလာပြီး ကျွန်တော်၏ရင်ဘတ်အား တောင်ဝှေးနှင့် အသာထောက်လိုက်သောကြောင့်လန့်သွားခဲ့ပါသည်။ ဆရာတော်က -“ဟဲ ..လူမိုက်ရဲ့ …၊ အဝေးကြီးတွေ လိုက်ပြီး စဉ်းစားနေတယ် …၊ ဂုဏ်တော်ကိုသာ ထုံစမ်းပါကွယ် …”ဟု မိန့်သွားပါသည်။

ကျွန်တော်လည်း ဆတ်ခနဲ လန့်နိုးသွားကာ ဇဝေဇဝါ ဖြစ်နေမိပါသည်။ အိပ်မက်မက်ခြင်း ဖြစ်ပါလိမ့်မည်။ သို့ရာတွင် ထိုအိပ်မက်ကို အလေးအနက် တစိမ့်စိမ့်တွေးရင်း အိမ်ပြန်ရောက်သောအခါ ဂုဏ်တော်နှင့်ပတ်သက်သော စာအုပ်စာတမ်းများကို မွှေနှောက်ပြီး မှတ်စုထုတ်လိုက်သောအခါ အောက်ပါ စာမူတစ်ပုဒ် ပေါ်ပေါက်လာခဲ့ရပါတော့သတည်း။

၁။ ဘုန်းကျက်သရေ တိုးတက်လိုလျှင်

သောဘဂဝါ ဣတိပိ အရဟံ …ကို အဓိ ဋ္ဌာန်ပုတီး စိပ်ပါလေ။

၂။ အကြံကောင်းဉာဏ်ကောင်း ပေါ်လိုလျှင်

သောဘဂဝါ ဣတိပိ သမ္မာ သမ္ဗုဒ္ဓေါ … ကို အဓိဋ္ဌာန်ပုတီး စိပ်ပါလေ။

၃။ အကြံအစည်များအောင်လိုလျှင်

သောဘဂဝါ ဣတိပိ ဝိဇ္ဇာစရဏ သမ္မန္နော ကို အဓိဋ္ဌာန်ပုတီး စိပ်ပါလေ။

၄။ ပြောစကား အောင်စေလိုလျှင်

သောဘဂဝါ ဣတိပိ သုဂတော … ကို အဓိဋ္ဌာန်ပုတီး စိပ်ပါလေ။

၅။ ထင်ပေါ်ကျော်ဇောလိုလျှင်

သောဘဂဝါ ဣတိပိ လောကဝိဒူ … ကို အဓိဋ္ဌာန်ပုတီး စိပ်ပါလေ။

၆။ လူနတ်တိရစ္ဆာန်များကချစ်စေလိုလျှင်

သောဘဂဝါ ဣတိပိ အနုတ္တရောပုရိသ ဓမ္မသာရထိ … ကို အဓိဋ္ဌာန်ပုတီး စိပ်ပါလေ။

၇။ သူတစ်ပါးတို့၏အလိုဆန္ဒကို ဖြည့်ဆည်းကူညီလိုလျှင်

သောဘဂဝါ ဣတိပိ သတ္ထာဒေဝ မနုဿာနံ … ကို အဓိဋ္ဌာန်ပုတီး စိပ်ပါလေ။

၈။ လောကုတ္တရာသမာဓိ တိုးပွားအောင်မြင်လိုလျှင်

သောဘဂဝါ ဣတိပိ ဗုဒ္ဓေါ … ကို အဓိ ဋ္ဌာန်ပုတီး စိပ်ပါလေ။

၉။ သူတစ်ပါးတို့ မပြိုင်ဆိုင်ဝံ့ဘဲ လေးစားကြောက်ရွံ့စေလိုလျှင်

သောဘဂဝါ ဣတိပိ ဘဂဝါ … ကို အဓိဋ္ဌာန်ပုတီး စိပ်ပါလေ။

ကောင်းစည်သူ(ပုဂံမြို့သစ်)