သက်ရှည်ကျန်းမာ ယတြာ

နေထိုင်မကောင်း ဖြစ်ကြသောအခါ ဆေးဆရာထံသို့ သွားကြစမြဲဖြစ်သကဲ့သို့ ကံ၏အကူအပံ့ကို ရရှိစေရန်အတွက် ဗေဒင်ယတြာနည်းများကိုလည်း အားကိုးလေ့ရှိကြပါသည်။

ဆေးဝါးတွေက ဘယ်လောက်ပဲကောင်းကောင်း ကံကုန်ပြီဆိုလျှင်တော့ ကျန်းမာသက်ရှည်ဖို့ မလွယ်ကူသလို ကံက ဘယ်လောက်ပဲကောင်းကောင်း ကံကိုယုံပြီး ဆူးပုံမနင်းရာ ဆိုသည့်အတိုင်း ဆေးကောင်းဝါးကောင်း မမှီဝဲဘူးဆိုလျှင်တော့ သက်ရှည်ကျန်းမာဖို့ရန် မလွယ်ကူနိုင်ပါပေ။

သို့ပါသောကြောင့် ကျွန်တော်တို့ငယ်စဉ်ကပင် ကြားဖူးခဲ့ပြီး ယနေ့ထက်တိုင်လည်း အသုံးတည့်နေဆဲ ရှေးဆရာတို့၏ သက်ရှည်ကျန်းမာလန်းဖြာ စေသောနည်းကောင်းတစ်ခုကို ရေးသားလိုက်ရပေတော့သည်။

အကယ်၍ ကျန်းမာရေးညံ့သူသည် တနင်္ဂနွေသားသမီး ဖြစ်သည်ဆိုပါစို့ နေ့နံတူအသားဖြစ်သော အုန်းသား(သို့မဟုတ်) အင်သားကို သူ၏ လူ တစ်ရပ် တိုင်း၍ဖြတ်ရပါမည်။

(လူတစ်ရပ်စာ ခက်ခဲသောသစ်သားဖြစ်နေလျှင်မူ လက်တစ်တောင်တိုင်း၍ ဖြတ်ရပါမည်)

ဆန်အကောင်းစား နို့ဆီဘူး ၇ ဘူးကို အထုပ် သုံးထုပ် အညီအမျှ ခွဲ၍ထုပ်ရပါမည်။

တစ်ထုပ်ကို သစ်ကိုင်း၏အဖျားဘက်တွင် ပူး၍ချည်ရပါမည်။ တစ်ထုပ်ကို အလယ်ပိုင်း၊ ကျန် တစ်ထုပ်ကို အရင်းပိုင်းတွင် ပူး၍ချည်ရပါမည်။

ထိုအတိုင်း လူနာ၏အိပ်ရာဘေးတွင် တစ်ည ထားရပါမည်။ (ခေါင်းရင်းဘက်မှာ အဖျားပိုင်း၊ ခြေ ရင်းဘက်မှာ အရင်းပိုင်း ရှိပါစေ)

(လူနာမှာ အမျိုးသားဖြစ်ပါက အိပ်ယာ၏ လက်ဝဲဘက်တွင်၊ အမျိုးသမီးဖြစ်ပါက အိပ်ယာ၏ လက်ယာဘက်တွင် ထားရမည်ဖြစ်ပါသည်။)

နောက်တစ်နေ့နံနက်တွင် ဆန်ထုပ်များကို မှတ်သား၍ဖြုတ်ပြီး ပထမအပေါ်ဆုံးဆန်ထုပ်ကိုချက် ၍ ဆွမ်းတော်တင်လှူရပါမည်။ ရဟန်းသံဃာများကို လောင်းလှူရပါမည်။

ဒုတိယအလယ်ပိုင်းမှဆန်ထုပ်ကို ချက်၍ လူကြီးမိဘ ဆရာသမားတို့အား ကျွေးမွေးရပါမည်။

တတိယအောက်ဆုံးမှဆန်ထုပ်ကိုချက်၍ ခွေး၊ ကြောင်၊ ကြက်၊ ငှက် တိရစ္ဆာန်များအား ဒါနပြုရပါသည်။

သစ်ကိုင်းကိုမူ မြစ်ထဲ၊ ချောင်းထဲသို့ မျှောလိုက်ရန်ဖြစ်ပါတော့သည်။

စောရဲထူး(လှိုင်)